Астанада жобалық инжиниринг пен құрылысқа арналған цифрлық шешімдерді әзірлеуде әлемдік көшбасшы «Autodesk» компаниясы ұйымдастырған BI University бастамасымен «Technology Day» бірінші халықаралық форумы өтті. Іс-шара АҚШ, Еуропа және Таяу Шығыстың сарапшыларын жинап, оларға құрылыс индустриясында қолданылатын соңғы технологиялар мен шешімдерді талқылауға мүмкіндік берді.

Форумға «Қазақ құрылыс және сәулет ғылыми-зерттеу институты» АҚ даму және цифрландыру жөніндегі басқарушы директоры Александр Шахнович, сондай-ақ ақпараттық модельдеу орталығының мамандары қатысты. Олар талқылаулар мен тәжірибе алмасуда белсенділік танытты. «ҚазҚСҒЗИ» АҚ өкілдері Қазақстанның құрылыс саласының тиімділігі мен бәсекеге қабілеттілігін арттыру үшін цифрлық технологияларды енгізудің маңыздылығын атап өтті.

Іс-шара аясында «Autodesk» жаңа құралдары мен платформалары, соның ішінде жобаларды басқаруға арналған бұлтты технологиялар және жобалық процестерді автоматтандыру туралы баяндамалар ұсынылды.Қатысушылар BIM саласындағы соңғы инновациялар және олардың жаһандық құрылыс индустриясына әсері туралы білді.

Сонымен қатар, аралас шындықтың қосымшалары және олардың сәулет және құрылыс процестеріндегі рөлі көрсетілді. Қатысушылар арматураны жобалауды жеңілдететін және процестерді автоматтандыратын Revit бағдарламасындағы жаңа мүмкіндіктермен таныса алды.

Форум сонымен қатар құрылыста виртуалды шындықты қолданудың практикалық көрсетілімін қамтыды, бұл қатысушыларға жаңа технологиялар әлеміне енуге мүмкіндік берді.

«Technology Day» құрылыс индустриясының мамандары арасында білім мен тәжірибе алмасудың маңызды алаңына айналды. Ұйымдастырушылар қатысушыларды географиялық тұрғыда көбейтіп, бағдарламаға одан да көп инновациялық тақырыптар мен технологияларды қосып, шараны жыл сайын өткізуді жоспарлап отыр.