«ҚазҚСҒЗИ» АҚ мамандары тұрғын және қоғамдық ғимараттарға арналған ілінетін темірбетон панельдерінің эксперименттік сынақтарын жүргізді.

Бұл эксперименттік-зерттеу жұмысының негізгі мақсаты – қатқыл конструктивтік схемалары бар ғимараттарға арналған сыртқы қабырғалық темірбетон панельдерінің тиімділігін бағалау және сейсмикалық қауіпті аймақтарда пайдалану мүмкіндігін зерттеу.

Зерттеу барысында келесі міндеттер қойылды:

• • Темірбетон конструкцияларының сейсмикалық жүктемелер әсеріндегі (жазықтықта және жазықтықтан тыс) мінез-құлқын зерттеу.
• • Темірбетон панельдері мен ғимараттың негізгі конструктивтік элементтері арасындағы қосылыстардың сенімділігін тексеру.
• • Сейсмотұрақтылықты қамтамасыз ететін оңтайлы құрылымдық шешімдерді анықтау және антисейсмикалық күшейтуге кететін шығындарды азайту.
• • Темірбетон панельдерінің құрылымдық шешімдерін жетілдіру бойынша ұсыныстар әзірлеу.
• • Қазақстан Республикасының сейсмотұрақты құрылысында ілінетін темірбетон панельдерін қолданудың тиімді салаларын анықтау.

Қасбет жүйелерін эксперименттік зерттеу екі қабатты болат қаңқадан тұратын арнайы сынау орнында жүргізілді. Сейсмикалық жүктемелерді модельдеу үшін стендтің төбесіне В-2 вибромашинасы орнатылып, тербеліс туғызды. Бұл ілінетін темірбетон панельдеріне динамикалық жүктеме түсіруге және олардың ғимарат жүйесіндегі мінез-құлқын зерттеуге мүмкіндік берді.