Қырғызстанда ТМД мен шет елдердің жетекші ғалымдарын, мамандар мен сарапшыларды біріктірген жер сілкінісіне төзімді құрылыс бойынша V Халықаралық ғылыми-практикалық конференция өтті. Іс-шара аясында ғимараттар мен құрылыстардың сейсмикалық қауіпсіздігі мен тұрақтылығының негізгі мәселелері талқыланды.

«ҚазҚСҒЗИ» АҚ өндіріс жөніндегі басқарушы директоры және сейсмикаға төзімді құрылыс жөніндегі халықаралық қауымдастық (МАЭСС) Төралқасының құрметті мүшесі Ералы Шоқбаров алғы сөз сөйледі. Ол сейсмикаға төзімді құрылыс саласындағы халықаралық ынтымақтастықтың маңыздылығын атап өтті. Марапаттау барысында Ералы Шоқбаров осы саланың дамуына қосқан елеулі үлесі үшін «жер сілкінісіне төзімділікті зерттеудегі еңбек сіңірген қайраткер» медалімен марапатталды.

Техника ғылымдарының кандидаты және «ҚазҚСҒЗИ» АҚ көп қабатты ғимараттар зертханасының меңгерушісі Жасұлан Омаров «L-BCTK Краспан» аспалы қасбеттік жүйелерін вибродинамикалық сынау» тақырыбында баяндама жасады. Оның жұмысын МАЭСС халықаралық конкурстық комиссиясы жоғары бағалап, Maurer SPS GmbH неміс компаниясы қаржыландырған бірінші дәрежелі «Үздік ғылыми-зерттеу жұмысы» номинациясының лауреаты атанды.

Сондай-ақ, «ҚазҚСҒЗИ» АҚ-тың зертханалық зерттеулер мен сынақтар инженерлері де баяндама жасады. Саид Дурсынов «Арматуралық элементтерді қолдана отырып, әлсіз негіздерді қатайту үшін сандық модельдеуді қолдану тәжірибесі» тақырыбында зерттеуін таныстырса, ал техник Жанна Қанатова «Шымкент қаласындағы топырақты нығайту кезінде сызықтық емес модельдеу үшін механикалық параметрлерді анықтау» жайлы баяндады.

Конференцияға қатысушылар ғылыми-техникалық және зерттеу тәжірибелерімен белсене бөлісіп, сейсмикалық қауіпсіздіктің өзекті мәселелері бойынша ашық диалогқа ықпал етті. Мұндай өзара іс-қимыл жалпы проблемаларды анықтауға және жер сілкінісіне төзімді құрылыстың сапасын жақсартуға бағытталған бірлескен шешімдерді әзірлеуге көмектесті.

Негізгі талқылаулар ғимараттар мен құрылыстардың жер сілкінісіне төзімділігі мәселелеріне назар аударуға, инженерлік-құрылыс білімін танымал етуге, сондай-ақ құрылыс нысандарының сенімділігі мен қауіпсіздігін арттыру үшін маңызды болып табылатын тірек конструкцияларын модельдеу, есептеу және талдау әдістерін жетілдіруге бағытталған.

Конференция барысында сейсмикалық оқшаулау саласындағы жаңа жетістіктер мен технологиялар, ғимараттардың сейсмикалық қауіптілігі мен осалдығын бағалау әдістері, сондай-ақ гидротехникалық және көлік өткізу құрылыстарының сейсмикалық төзімділігін арттыру жолдары қарастырылды.

Іс-шара бағдарламасы конференцияның жоғары ақпараттылығы мен интерактивтілігін қамтамасыз ететін презентациялар мен баяндамалардың әртүрлі форматтарын қамтыды.