Бүгін Қазақстан Республикасы Парламенті палаталарының бірлескен отырысында Президент Қасым-Жомарт Тоқаев өзінің жыл сайынғы халыққа Жолдауын ұсынды. Іс-шараға Сенат пен Мәжіліс депутаттары, орталық мемлекеттік органдардың басшылары, Ұлттық құрылтай, Адам құқықтары жөніндегі комиссия, Әйелдер істері және отбасылық-демографиялық саясат жөніндегі ұлттық комиссия мүшелері, қоғам өкілдері және еңбек ұжымдары қатысты.

Президент өз Жолдауында Қазақстанның алдағы кезеңге арналған саяси және әлеуметтік-экономикалық даму перспективаларын белгілеп, бірнеше басым бағыттарды атап өтті:

1. Ақша-несие саясаты мен фискалды саясаттың арасындағы үйлесімсіздікті жою.
2. Инвестициялық ахуалды және бизнес жүргізу жағдайларын жақсарту.
3. Еліміздің өнеркәсіп әлеуетін толық пайдалану.
4. Бірініші кезектегі инфрақұрылымдық мәселелерді шешу.
5. Кадрлық әлеуетті арттыру.
6. Ұлт денсаулығын нығайту және әлеуметтік қолдау жүйесін қалпына келтіру.
7. Экологиялық ахуалды жақсарту және қоршаған ортаны қорғауды дәріптеу.
8. Мемлекеттік басқару ісінің тиімділігін арттыру.
9. Қоғамда заң мен тәртіп идеологиясын терең бекіту.

Бұл бағыттар әділдікті, орнықты экономикалық өсуді қамтамасыз ету және азаматтардың әл-ауқатын арттыру бағытын айқындай отырып, таяу жылдары Қазақстанның одан әрі дамуы үшін негіз болады.